מקור דברי הימים א י״ח
1 וַֽיְהִי֙ אַֽחֲרֵי־כֵ֔ן וַיַּ֥ךְ דָּוִ֛יד אֶת־פְּלִשְׁתִּ֖ים וַיַּכְנִיעֵ֑ם וַיִּקַּ֛ח אֶת־גַּ֥ת וּבְנֹתֶ֖יהָ מִיַּ֥ד פְּלִשְׁתִּֽים׃
2 וַיַּ֖ךְ אֶת־מוֹאָ֑ב וַיִּהְי֤וּ מוֹאָב֙ עֲבָדִ֣ים לְדָוִ֔יד נֹשְׂאֵ֖י מִנְחָֽה׃
3 וַיַּ֥ךְ דָּוִ֛יד אֶת־הֲדַדְעֶ֥זֶר מֶלֶךְ־צוֹבָ֖ה חֲמָ֑תָה בְּלֶכְתּ֕וֹ לְהַצִּ֥יב יָד֖וֹ בִּֽנְהַר־פְּרָֽת׃
4 וַיִּלְכֹּד֩ דָּוִ֨יד מִמֶּ֜נּוּ אֶ֣לֶף רֶ֗כֶב וְשִׁבְעַ֤ת אֲלָפִים֙ פָּרָשִׁ֔ים וְעֶשְׂרִ֥ים אֶ֖לֶף אִ֣ישׁ רַגְלִ֑י וַיְעַקֵּ֤ר דָּוִיד֙ אֶת־כׇּל־הָרֶ֔כֶב וַיּוֹתֵ֥ר מִמֶּ֖נּוּ מֵ֥אָה רָֽכֶב׃
5 וַיָּבֹא֙ אֲרַ֣ם דַּרְמֶ֔שֶׂק לַעְז֕וֹר לַהֲדַדְעֶ֖זֶר מֶ֣לֶךְ צוֹבָ֑ה וַיַּ֤ךְ דָּוִיד֙ בַּאֲרָ֔ם עֶשְׂרִֽים־וּשְׁנַ֥יִם אֶ֖לֶף אִֽישׁ׃
6 וַיָּ֤שֶׂם דָּוִיד֙ בַּאֲרַ֣ם דַּרְמֶ֔שֶׂק וַיְהִ֤י אֲרָם֙ לְדָוִ֔יד עֲבָדִ֖ים נֹשְׂאֵ֣י מִנְחָ֑ה וַיּ֤וֹשַׁע יְהֹוָה֙ לְדָוִ֔יד בְּכֹ֖ל אֲשֶׁ֥ר הָלָֽךְ׃
7 וַיִּקַּ֣ח דָּוִ֗יד אֵ֚ת שִׁלְטֵ֣י הַזָּהָ֔ב אֲשֶׁ֣ר הָי֔וּ עַ֖ל עַבְדֵ֣י הֲדַדְעָ֑זֶר וַיְבִיאֵ֖ם יְרוּשָׁלָֽ͏ִם׃
8 וּמִטִּבְחַ֤ת וּמִכּוּן֙ עָרֵ֣י הֲדַדְעֶ֔זֶר לָקַ֥ח דָּוִ֛יד נְחֹ֖שֶׁת רַבָּ֣ה מְאֹ֑ד בָּ֣הּ עָשָׂ֣ה שְׁלֹמֹ֗ה אֶת־יָ֤ם הַנְּחֹ֙שֶׁת֙ וְאֶת־הָֽעַמּוּדִ֔ים וְאֵ֖ת כְּלֵ֥י הַנְּחֹֽשֶׁת׃ פ
9 וַיִּשְׁמַ֕ע תֹּ֖עוּ מֶ֣לֶךְ חֲמָ֑ת כִּ֚י הִכָּ֣ה דָוִ֔יד אֶת־כׇּל־חֵ֖יל הֲדַדְעֶ֥זֶר מֶלֶךְ־צוֹבָֽה׃
10 וַיִּשְׁלַ֣ח אֶת־הֲדֽוֹרָם־בְּנ֣וֹ אֶל־הַמֶּֽלֶךְ־דָּ֠וִ֠יד לשאול לִשְׁאׇל־ל֨וֹ לְשָׁל֜וֹם וּֽלְבָרְכ֗וֹ עַל֩ אֲשֶׁ֨ר נִלְחַ֤ם בַּהֲדַדְעֶ֙זֶר֙ וַיַּכֵּ֔הוּ כִּי־אִ֛ישׁ מִלְחֲמ֥וֹת תֹּ֖עוּ הָיָ֣ה הֲדַדְעָ֑זֶר וְכֹ֗ל כְּלֵ֛י זָהָ֥ב וָכֶ֖סֶף וּנְחֹֽשֶׁת׃
11 גַּם־אֹתָ֗ם הִקְדִּ֞ישׁ הַמֶּ֤לֶךְ דָּוִיד֙ לַֽיהֹוָ֔ה עִם־הַכֶּ֙סֶף֙ וְהַזָּהָ֔ב אֲשֶׁ֥ר נָשָׂ֖א מִכׇּל־הַגּוֹיִ֑ם מֵאֱד֤וֹם וּמִמּוֹאָב֙ וּמִבְּנֵ֣י עַמּ֔וֹן וּמִפְּלִשְׁתִּ֖ים וּמֵעֲמָלֵֽק׃
12 וְאַבְשַׁ֣י בֶּן־צְרוּיָ֗ה הִכָּ֤ה אֶת־אֱדוֹם֙ בְּגֵ֣יא הַמֶּ֔לַח שְׁמוֹנָ֥ה עָשָׂ֖ר אָֽלֶף׃
13 וַיָּ֤שֶׂם בֶּאֱדוֹם֙ נְצִיבִ֔ים וַיִּהְי֥וּ כׇל־אֱד֖וֹם עֲבָדִ֣ים לְדָוִ֑יד וַיּ֤וֹשַׁע יְהֹוָה֙ אֶת־דָּוִ֔יד בְּכֹ֖ל אֲשֶׁ֥ר הָלָֽךְ׃
14 וַיִּמְלֹ֥ךְ דָּוִ֖יד עַל־כׇּל־יִשְׂרָאֵ֑ל וַיְהִ֗י עֹשֶׂ֛ה מִשְׁפָּ֥ט וּצְדָקָ֖ה לְכׇל־עַמּֽוֹ׃
15 וְיוֹאָ֥ב בֶּן־צְרוּיָ֖ה עַל־הַצָּבָ֑א וִיהוֹשָׁפָ֥ט בֶּן־אֲחִיל֖וּד מַזְכִּֽיר׃
16 וְצָד֧וֹק בֶּן־אֲחִיט֛וּב וַאֲבִימֶ֥לֶךְ בֶּן־אֶבְיָתָ֖ר כֹּהֲנִ֑ים וְשַׁוְשָׁ֖א סוֹפֵֽר׃
17 וּבְנָיָ֙הוּ֙ בֶּן־יְה֣וֹיָדָ֔ע עַל־הַכְּרֵתִ֖י וְהַפְּלֵתִ֑י וּבְנֵי־דָוִ֥יד הָרִֽאשֹׁנִ֖ים לְיַ֥ד הַמֶּֽלֶךְ׃ פ
פירוש רש"י על דברי הימים א י״ח
1 וַיְהִי אַחֲרֵי כֵן וַיַּךְ דָּוִיד. אַחַר שֶׁאָמַר דָּוִד לִבְנוֹת בַּיִת, וְאָמַר לוֹ הַקָּדוֹשׁ בָּרוּךְ הוּא: לֹא תִבְנֶה אַתָּה, אָמַר דָּוִד: הוֹאִיל וְאֵין עָלַי לִבְנוֹת הַבַּיִת אֶלָּא בְּנִי, עַתָּה אָכִינָה וַאֲסַדֵּר לוֹ הַכֹּל, לִכְשֶׁיָּבֹא בְּנִי לִבְנוֹת הַבַּיִת שֶׁיְּהֵא לוֹ הַכֹּל מְזֻמָּן. וְעַתָּה מַנִּיחַ הַכֹּל וְהוֹלֵךְ וּמְסַפֵּר הֵיאַךְ זִמֵּן לוֹ הַבִּנְיָן, שֶׁנִּלְחַם עִם אוֹיְבָיו וְהִקְדִּישׁ שְׁלָלָם לְבִנְיַן הַבַּיִת. וְכֵן דֶּרֶךְ הַפָּסוּק לְדַבְּרוֹ, וְדֻגְמָא בְּאֵלִיָּהוּ וּבֶאֱלִישָׁע: מֵאַחַר שֶׁאָמַר ״יְהִי נָא פִּי שְׁנַיִם בְּרוּחֲךָ אֵלָי״ מלכים ב ב:ט, מַנִּיחַ כָּל הַמַּעֲשֶׂה מִן הַמְּלָכִים וּמְסַפֵּר וְהוֹלֵךְ מִן נִפְלְאוֹת אֱלִישָׁע הֵיאַךְ הָיוּ פִּי שְׁנַיִם, עַד שֶׁיַּשְׁלִים הַכֹּל:
2 וַיַּךְ דָּוִיד אֶת הֲדַדְעֶזֶר מֶלֶךְ צוֹבָה חֲמָתָה. בַּחֲמָת הָיְתָה הַמִּלְחָמָה, וּבַחֲמָת הִכָּם דָּוִד:
3 חֲמָתָה. כְּמוֹ לַחֲמָת:
4 לְהַצִּיב יָדוֹ. פִּתְרוֹנוֹ: כְּשֶׁהָלַךְ לְהַצִּיב כֹּחוֹ, לְהָשִׁיב גְּבוּלוֹ וּלְהַצִּיב בִּנְהַר פְּרָת, שֶׁהָיָה מֵשִׁיב לִגְבוּל נְהַר פְּרָת; וְדוּגְמָא: ״וְאַבְשָׁלוֹם לָקַח וַיַּצֶּב לוֹ בְחַיָּיו וְגוֹ׳ וַיִּקְרָא לָהּ יַד אַבְשָׁלוֹם״ שמואל ב יח:יח, שֶׁפִּתְרוֹנוֹ: כֹּחַ גְּבוּל אַבְשָׁלוֹם. דָּבָר אַחֵר: ״וַיִּקְרָא לָהּ יַד אַבְשָׁלוֹם״ – בְּתוֹךְ הַמַּצֵּבָה צָר אַבְשָׁלוֹם צוּרַת אֹרֶךְ יָדוֹ, כְּדִכְתִיב בְּאוֹתוֹ פָּסוּק, ״כִּי אָמַר״, זֹאת הַצּוּרָה הַמְצוּיֶּרֶת אַחַר יַד אַבְשָׁלוֹם מִפִּי רַבִּי יִצְחָק בַּר שְׁמוּאֵל בְּנַרְבּוֹנָא שָׁמַעְתִּי כֵּן:
5 וַיְעַקֵּר דָּוִיד. וּמִשּׁוּם דִּכְתִיב ״לֹא יַרְבֶּה לּוֹ סוּסִים״ דברים יז:טז, כְּדִכְתִיב ״וְאֶת סוּסֵיהֶם תְּעַקֵּר״ יהושע יא:ו:
6 וַיּוֹתֵר מִמֶּנּוּ מֵאָה רָכֶב. ״לֹא יַרְבֶּה לּוֹ סוּסִים״ דברים יז:טז – הָא כְּדֵי מֶרְכַּבְתּוֹ מֻתָּר סנהדרין כא::
7 וַיָּבֹא אֲרַם דַּרְמֶשֶׂק. בִּשְׁמוּאֵל שמואל ב ח:ה כְּתִיב ״דַּמֶּשֶׂק״! וְדֶרֶךְ הַפָּסוּק לְדַבֵּר כֵּן, כְּמוֹ מִן שֵׁבֶט ״שַׁרְבִיט״ אסתר ד:יא, שֶׁהֲרֵי ״אֲיַסֵּר אֶתְכֶם בַּשּׁוֹטִים״ דברי הימים ב י:יא – תַּרְגּוּם: ״שַׁרְבִּיטִים״. גַּם זוֹ אָמַר רַבִּי יִצְחָק:
8 וַיָּשֶׂם דָּוִיד בַּאֲרַם דַּרְמֶשֶׂק. פִּתְרוֹן: נְצִיבִים, וּבִשְׁמוּאֵל שמואל שם כְּתִיב בְּפֵירוּשׁ ״וַיָּשֶׂם דָּוִיד בַּאֲרַם דַּמֶּשֶׂק נְצִיבִים״ שמואל ב ח:ו:
9 שִׁלְטֵי הַזָּהָב. בּוֹיכְרְ״שׁ בְּלַעַ״ז, דּוּגְמָתוֹ: ״הָבֵרוּ הַחִצִּים מִלְאוּ הַשְּׁלָטִים״ ירמיהו נא:יא:
10 נְחֹשֶׁת רַבָּה מְאֹד בָּהּ עָשָׂה וְגוֹ׳. וְזֶהוּ שֶׁאָמַר: כֵּיוָן שֶׁאָמַר דָּוִד לִבְנוֹת הַבַּיִת, וְאָמַר הַקָּדוֹשׁ בָּרוּךְ הוּא לוֹ: ״לֹא אַתָּה תִבְנֶה הַבַּיִת כִּי אִם בְּנֶךָ״ דברי הימים א יז:ד, מְסַפֵּר וְהוֹלֵךְ הֵיאַךְ זִמֵּן לוֹ לִבְנוֹת הַבִּנְיָן:
11 כִּי אִישׁ מִלְחֲמוֹת תֹּעוּ. בַּעַל מַחֲלֹקְתּוֹ הָיָה, וְכֵן מוֹכִיחַ לְמַעְלָה וַיַּךְ דָּוִד אֶת הֲדַרְעֶזֶר – וְכִי מָה עִנְיָן לָהֶם לַחֲמָת לַעֲרֹךְ בּוֹ מִלְחָמָה? אֶלָּא הֲדַרְעֶזֶר מֶלֶךְ צוֹבָה הָלַךְ לְהִלָּחֵם עַל תֹּעוּ מֶלֶךְ חֲמָת בַּחֲמָת, וּבְעוֹד כֵּן בָּא דָּוִד עָלָיו וְהִכָּהוּ. וְכֹל כְּלֵי זָהָב וָכֶסֶף וּנְחֹשֶׁת הֵבִיא לְדָוִד, וְכֵן ״וּבְיָדוֹ הָיָה כְּלֵי כֶסֶף וּכְלֵי זָהָב וּכְלֵי נְחֹשֶׁת״ שמואל ב ח:י:
12 וַיָּשֶׂם בֶּאֱדוֹם נְצִיבִים. שָׁלְטוֹנִים, שֶׁלֹּא רָצָה לְהַמְלִיךְ עֲלֵיהֶם מֶלֶךְ:
13 מִשְׁפָּט וּצְדָקָה. מָשַׁךְ עַצְמוֹ מִלְּהִלָּחֵם עוֹד וּמִלָּצֵאת וְלָבֹא עוֹד בַּמִּלְחָמָה, וְהָיָה יוֹשֵׁב וְשׁוֹפֵט תָּמִיד יִשְׂרָאֵל בִּצְדָקָה:
14 וְיוֹאָב וְגוֹ׳ עַל הַצָּבָא. – לְפִי שֶׁמָּשַׁךְ יָדוֹ מִלָּצֵאת עוֹד בַּצָּבָא, הִנִּיחַ יוֹאָב עַל הַצָּבָא לְהִלָּחֵם כָּל מִלְחַמְתּוֹ. כָּל זֶה מוּסָב עַל עָשָׂה מִשְׁפָּט וּצְדָקָה, וּמַה שֶּׁהִפְסִיק וְיוֹאָב עַל הַצָּבָא, מִשּׁוּם הָכִי הֻצְרַךְ, שֶׁלֹּא תֹּאמַר: הוֹאִיל וְדָוִד עָשָׂה מִשְׁפָּט, אִם כֵּן לֹא הָיוּ יִשְׂרָאֵל עוֹד נִלְחָמִים, לְכָךְ נֶאֱמַר: וְיוֹאָב עַל הַצָּבָא:
15 מַזְכִּיר. חוֹזֵר לָרֹאשׁ, שֶׁהָיָה מַזְכִּיר אֵיזֶה דִּין בָּא לִפְנֵי הַמֶּלֶךְ תְּחִלָּה; דּוּגְמָא: ״לְהָבִיא אֶת סֵפֶר הַזִּכְרוֹנוֹת דִּבְרֵי הַיָּמִים״ אסתר ו:א:
16 וְשַׁוְשָׁא סוֹפֵר. ״אֲחִילוּד מַזְכִּיר״ דברי הימים א יח:טו, וְשַׁוְשָׁא כּוֹתֵב עַל יָדוֹ:
17 עַל הַכְּרֵתִי וְהַפְּלֵתִי. פִּתְרוֹנוֹ: אֻמּוֹת הָיוּ, כְּדִכְתִיב ״הוֹי גּוֹי כְּרֵתִים״ צפניה ב:ה; וּמֵאֻמּוֹתָם הָיוּ עִם דָּוִד אֲנָשִׁים גִּבּוֹרֵי חַיִל וּבְנָיָהוּ עֲלֵיהֶם; וְדֻגְמָא בִּשְׁמוּאֵל: ״וְכָל עֲבָדָיו עֹבְרִים עַל יָדוֹ וְכָל הַכְּרֵתִי וְכָל הַפְּלֵתִי וְכָל הַגִּתִּים וְגוֹמֵר״ שמואל ב טו:יח:
18 וּבְנֵי דָוִד הָרִאשֹׁנִים לְיַד הַמֶּלֶךְ. פִּתְרוֹנוֹ: וּבְנֵי דָוִד הָיוּ תָּמִיד רִאשׁוֹנִים אֵצֶל הַמֶּלֶךְ לַעֲשׂוֹת כָּל צָרְכּוֹ: